ඉහත ඡායාරූප දෙක කෙරෙහි ඔබේ අවධානය යොමු කරනු කැමැත්තෙමි. මුස්ලිම් ජාතිකයන් පිරිසක් වෙසක් කූඩු රැගෙන සිටින පළමු ඡායාරූපය සිංහල බෞද්ධයා නම් ෆේස්බුක් පිටුව පළකර තිබුණේ මෙසේ සදහන් කරමිනි.
"රාමසාන් එකට කිරි අම්මලාගේ බෙලි කපලා ඒ අසරණයින් ගැහි ගැහී ලේ පෙරන හැටි බලා ඉඳලා අන්තිමට ඒ කිරි අම්මලාගේ ම මස් ටික උයාගෙන කන එක දැන් සමහර මුස්ලීමුන්ට එපා වෙලා. මෙන්න ඔවුන්ගෙන් පිරිසක් මේ වෙසක් එකේ බෞද්ධ කටයුතු වල නියැලෙනවා."
දෙවැන්න ඕපදූප අඩවියක් යැයි නිතර බැනුම් අසන ගොසිප් ලංකාවලින් උපුටාගෙන ෆේස්බුක් අම්බලම නම් පිටුවක් පළ කල ඡායාරූපයකි.
මේවාය තිබූ කමෙන්ටද බොහෝය.
මුසල්මානුවන් බෞද්ධයන් සමග සහයෝගයෙන් වැඩකරන්නේ
1. ඇතැමුන් කියන විදියට කපටිකමටය
2. ඇතැමුන් කියන විදියට අල්ලාගේ දහමට පයින් ගැසීමෙන් අනතුරුවය
මම ඒ පිළිබද කිසිවක් නොකියමි. අපි කුඩාකාලයේ නත්තල් සීයා එනතුරු බලා සිටියේ, ගව ලෙන් හැදුවේ, නත්තල් ගස් හැදුවේ බුදු දහම අතහැර එයට පයින් ගසාදැයි මම ඔබෙන් අසමි. එය ඔබේ කපටිකමයයි කිසිවෙක් චෝදනා කළේනම්, නොඑසේනම් මොකෝ බුද්ධාගම අතෑරියද යයි කෙනෙක් විමසුවේනම් ඔබට කුමන හැගීමක් ඇතිවේදැයි මම විමසමි.
ඕනෑම කෙනෙකුට ඕනෑම ආගමක් ඇදහීමේ නිදහස පවතී. ආගමික සහජීවනය ගැන බුදු දහමේ දේශනා කරද්දී බෞද්ධයා ලෙස නාමික මේ පිටුව සටහන් කර ඇති දේ නිවැරදිදැයි මම විමසමි. වෙසක් පොහෝදිනයේදී බෞද්ධයා තුලත් අන්‍යාගමිකයන් තුලත් වෛරී සිතිවිලි ඇති කිරීමේ ඔබේ පරමාර්ථය ඔබේ පිටුවේ නමට ගැලපෙන්නේදැයි මම විමසමි.
සුළුතරයක් වන අන්තවාදීන්ගේ ගොඩට බහුතරයක් සාමාන්‍ය මුස්ලිම් මිනිසුන් දමාගැනීමෙන් ඔබ කුමක් බලාපොරොත්තු වන්නේද මම විමසමි. බුදුන් මේ දහම වදාලේ තේරුම්ගත හැකිවුන්ට පමණි. ඔබට එහි හරය නොවැටහේනම් කරුනාකර පිටුවේ නම වෙනස්කර ඕනෑ දෙයක් පළ කරගත්තාට කම් නැත. මන්දයත් ඔබ පළ කරන ඇතැම් දේ සැබෑ බෞද්ධකමට සැබවින්ම නිගා කරන්නක් මෙන්ම අන්‍යාගමිකයන් තුල බෞද්ධයා කෙරෙහි වෛරයක් ඉපදවීමටද හේතු වේ.
සහෘද බෞද්ධයිනි යමකට කමෙන්ට් කිරීමට පෙර සිතා බලන්න. වෙනත් ආගම්වල ඉගැන්වීම් විවේචනය කිරීමට හෝ ගැරහීමට බුදුන් වහන්සේ අපට උගන්වා නැත. එනිසා මිසදිටු අන්‍යාගමිකයන් අපට අපහාස කලද ඔබේ බෞද්ධකම බෞද්ධයාගේ උතුම් තත්වය රැක ගැනීමට කටයුතු කරන්න.
නහී වේරේන වේරානි - සම්මන්තීච කුදාචනං
අවේරේනච සම්මන්තී - ඒස ධම්මෝ සනන්තනෝ
මෙලොව කිසි කලෙකත් වෛරයෙන් වෛරය නොසංසිඳේ. අවෛරයෙන්ම වෛරය සංසි‍ඳේ. මෙය පෙර සිට පැවතෙන සනාතන දහමකි.
බුදුන් වහන්සේ මෙලෙසින් වදාලහ.
ඔබ ගැටුමට නොගොස් කවර තැනක හෝ ධර්මානුකූලව යමක් පැහැදිලි කරන්නේනම් බුද්ධිමත් අන්‍යාගමිකයන් වුවද ඔබට කන්දෙනු ඇත. මෙය මම ප්‍රාෙයා්ගිකව අත්දැක ඇත්තෙමි. එබැවින් ඔබ ද්වේශයෙන් කමෙන්ට් දැමීමට පෙර සිතා බලන්න. ඇතැම් කමෙන්ට් කියවීමේදී බෞද්ධයින් වශයෙන් එවැනි කමෙන්ට් පළ කිරීම පිළිබද ලැජ්ජාවක් අතිවෙයි. තාර්කික උතුම් දහමක් අදහන මගේ සහෘද බෞද්ධයිනි කරුණාකර බෞද්ධයාගේ ගෞරවය සුරකින්න.
කවර හෝ මාධ්‍යයක පලවන්නක් හුදෙක් ෂෙයා කිරීමට හෝ ඔබේ ඔළුවට දා ගැනීමට පෙර සිහි නුවණින් සිතා බලන්න
බුදුන්වහන්සේ වදාලේ
එන්න , ඇවිත් විමසා බලන්න යනුවෙනි
-විදුරංග ගුණසේකර-
No comments:
Post a Comment